بداية باعتذر عن إللي علقّ على البوست ده إللي اتمسح عن طريق الخطأ
أنا عايزة بس أبارك مرة تانية لإبراهيم معايا عشان كتاب مغامير "عندما يتمرد الصدى" إللي صدر عن دار "أكتب" وفي رأيي المتواضع طبعا :) إنه حاجة تفرح في عالم الجماعات الأدبية إللي هي كمان لوحدها حاجة كويسة
وبما إنه كله كويس وكده :) فالقصيدة مرة تانية أهه وصباحكم ياسمين وليلي و فل
البحر بيضحك ...ليه؟
مبسوط ومزأطط...ليه؟
فرحان بشبابه الدايم؟
طب مش بيعجز ليه؟
أشمعنا إحنا إللي بنكبر...
وهمومنا معانا بتكبر...
وشباب البحر بيكبر...
وشبابنا بيصغر ليه؟
************
البحر بيضحك ...ليه؟
مبسوط ومزأطط...ليه؟
بيغني ويرقص ليه؟
طب مش بيعيط ليه؟
مالهوش أحباب هجروه...
مالهوش أحلام خذلوه
مارجعش ف مرة لشطه...
لقى شمسه ورمله باعوه؟
***********
البحر بيضحك...ليه؟
مبسوط ومزأطط...ليه؟
بيغني ويرقص...ليه؟
طب مش بيصّرخ ليه!
الخوف ما قطعش طريقه...
الجوع ما مسحش بريقه...
الظلم ضلامه ما حلش...
على موجه ونشف ريقه؟
**********
البحر بيضحك ليه؟
مبسوط ومزأطط ليه؟
بيغني ويرقص ...ليه؟
متفائل قوي كده ليه؟
ما يكونش البحر اتجنن
مايكونش اتعمى ف عنيه
مش شايف حتى طشاش
على شطه بيحصل إيه؟
البحر بيضحك ليه؟
البحر بيضحك ليه؟
3 comments:
حتى البحر مش سايبينه فـ حاله و بتحسدوه! ايه ياخويا الناس دي .. و بعدين مين قالك انه فرحان و مزقطط؟! ما يمكن قرفان م اللي بيحصل على شطه, و عشان كده بيعمل "زحف البحر" يمكن يمحي اللي مضايقه ما دام مش قادر يصلحه .. حاجة زي تسونامي تقول انه كان فرحان؟ لول ده يبقى بيفرح بطريقة غريبة اوي .. و الا عشان التاني كان محيط و شايف نفسه؟! .. اكيد البحر من كتر اللي جواه من قرف البني ادمين زمانه اشتكى, بس احنا بنفتري عليه زي ما افترينا على كل حاجة و بنقول انه فرحان --- بغض النظر عن هجصي ده كله, القصيدة حلوة اوي - اختيار موفق يا ميس
اول واحد ع المحطة النهاردة اهه .. عشان بس تعرفي اني ممكن اصحى بدري و اشرب اللبن كمان
ربنا يهنيكي و تبقي فرحانة و مزقططة
جميلة فعلا...
حلو الاستخدام المغاير لفكرة البحر الضاحك.
ريكيكو: الناس دلوقتي مش عارفة ليه مش بيسيبوا حد في حاله! حاجة غريبة قوي..إنت فعلا عندك حق :)
بس أنا أول مرة فعلا أفكر أن زحف البحر ممكن يعبر عن غضب البحر وتسونامي وكده..فكرة وجججججججيهة p: ويا صباح التجليات!
بس طبعا أنا مبسوطة جدا إنك جيت بدري المحطة...وإنت كمان ربنا يسعدك من أول محطة مصر لغاية محطة أسوان..مش قطورات بقى؟ صباح الفل والزقططة !
-------------------------
أحمد الشمسي: نورت المدونة..شمس برضوا وكده..صح؟ عندك حق في موضوع التناول الجديد..زي ما قلت..جميلة فعلا...
Post a Comment