Thursday, 1 February 2007

البحث عن حسحلاوي!

لا أجد خير من هذه الحادثة الطريفة كي أعود إلى المدونة:

أما "حسحلاوي" ، فهو من قام بسرقة قصة لي كانت قد نشرت في بص وطل، والموضوع جاء بالصدفة حين كنت أبحث في جوجل عن رابط قصتي لقراءة التعليقات التي جاءت عليها، ولكن بدلا من الرابط المطلوب وجدت رابط للقصة في منتدى قطري! ورابط آخر لمنتدى يدعى "مراحب".

والحقيقة إني امتاز بحسن نية لدرجة أحسد عليها، لذا ما ظننته في البداية أن شخص ما قد أعجبته القصة، فقرر نشرها في المنتدى وكنت أظن أنه لابد قد ذكر أسم كاتب القصة أو حتى من أين أتي بها، لكن هذا بالطبع لم يحدث! ما فعله هو أنه وضع القصة كمشاركة له في "منتدى القصة" في كلا الموقعين ، ولم يذكر أي شيئ عن إنها منقولة أو من أين جاء بها! ولم يكتف بذلك، بل أخذ يرد على المعجبين والمعجبات بكتابته في المنتدى في تباته وبجاحة غريبة:
"متشكر على مرورك الغالي"
"أسعدني للغاية إعجابك بالكلمات"
"ما أسعدني أكثر هو تواجدك في صفحتي المتواضعة "
"لا تحرميني تواصلك وتواجدك المستمر"
كنت استشيط غضبا دون مبالغة وأنا أقرأ تعليقات حسحلاوي على الردود التي جاءت على
القصة معظمهم من البنات طبعا! ورحت أقول لنفسي في غضب "بتتمنظر قدام البنات على حساب قصصي يا حسحلاوي! والله لأخرب بيتك!"

وخلال دقائق ، كنت قد اشتركت في المنتدى وأرسلت تعليقا لحسحلاوي! أقول له فيها إنه عيب عليه يسرق قصص الناس ويقول إنها بتاعته ! ثم وضعت له تحذيرا مفاده إنه إن لم يلغي المشاركة، فإني سيكون لي كلام آخر وتصرف آخر معه!
بعدها هدأت قليلا ...أعدت قراءة التعليقات على القصة واكتشفت اكتشافا هاما وهو أن السارق لا يدعى حسحلاوي كما كنت أظن، بل "حسن حلاوة" ولكن هكذا أنا وقت الفرح أو الغضب تدخل الحروف مع بعضها بشكل لا يخلو من إبداع فعلا! الإكتشاف الأشد وطأة إني وجدت قصة لي آخرى في المنتدى من إبداع حسن حلاوة! (مش عارفة أقول إيه الحقيقية؟)

المهم ، بعد مزيد من التهديدات إلى حسن حلاوة، ويوم ويومين ، كانت القصة كما هي في الموقع! كل ما تغير إنه أضاف إلى القصة كلمة "منقول" في النهاية ! ولغى بالطبع تعليقي الذي أقول له فيها إنه قام بسرقة القصص!

لا أدري حتى الآن ما هو "الكلام الثاني" الذي سأقوله له أو ما سأفعله كي يلغي حسن حلاوة قصتي من على المنتدى، عزائي الوحيد هو هؤلاء القراء الذين أعجبتهم القصة ، حتى لو كان حسن ده هو إللي سارقها!

القصة بالمناسبة أسمها "اللقاء الثاني" وكانت قد نشرتها بص وطل من فترة ليست بالبعيدة!

10 comments:

أحمد شعبان said...

صباح الفل ياشيماء
فكرتيني بقصص كنت اشتركت بيها ف مسابقة سوزان مبارك لأدب الطفل ومحصلش نصيب وبعد فترة لقيت قصة ليا منشورة بنفس اسمها وانها فائزة بجائزة أدب الطفل لكن ملزوق عليها اسم حد ابن ستين.....، إنما قد مازعلت قد ما فرحت إن قصتي فازت وإن المشكلة مكنتش في القصة، كانت فيا أنا
:(

Ferekico said...

حمد الله على سلامتك من كهف العزلة اللي كنتي فيه .. بس كنت اتمنى تخرجي منه في ظروف احسن من كده .. حسحلاوي, هي وصلت لدرجة حسحلاوي؟ .. عندي اقتراح توقفيه بيه عند حده .. ادخلي المنتدى اللي عليه القصة, و لما تفتح معاكي صفحة البداية شخبطي عليها كلها .. بس

على فكرة انا خدت البوسطجي نشرتها على مدونة مختارات عاملها .. بس كاتب انها منقولة عن مدونتك و حاطط لينك! مش كده برده ابقى في السليم؟

كراكيب نـهـى مـحمود said...

طيب اتاكدي يا شيماء كده
يمكن ليكي اسم تاني في سجلات الحكومة
حسحلاوي
حمد لله على سلامتك نورتي مدونتك

Anonymous said...

انا أول يوم أنهارده أعرف ان انت عندك بلوج , حاكلمك في حاجة مالهاش علاقة بالموضوع , ان قريتلك مجموعة قصصية اسمها الفراشة (عن دار ميريت) ان بس عايز أسجل إعجابي بالمجموعة لإني و كل صحابي حبينها و كمان (قصة الحفيد) انتي موهوبة قوي keep on the good work

Eslam

شيماء زاهر said...

أحمد شعبان:هي الصراحة تجربة قاسية أوي بس للأسف مافيش في إيدك حاجات كتيرة تعملها. أكيد في يوم من الأيام قصتك حتفوز وحيكون عليها أسمك..ربنا كبير وصباحك فل وياسمين :)

--------------
فريكيكو: هو صحيح كان كهف عزلة والحمد لله أني لقيت ناس زيك كده يشجعوا الواحد عشان يستمر ...
البوسطجي اتشرف في مدونتك ، ده الكلام وألا بلاش مش حسحلاوي..روح يا شيخ آلهي ربنا يكرمك و أشوفك دايما في أحسن حال..دعوة من القلب والله :))
------------------
كراكيب نهى: فكرة جهنمية وحاشوف كده إيه النظام..شيماء حسحلاوي! صباحك ورد وشكولاته يا نهى..وحشاني بجد...
---------------------
إسلام: أنا أصراحة مش عارفة أقول لك إيه..يا سيدي ألف شكر على اهتمامك بكتابة التعليق ده...ما تتخيلش انبسطت قد إيه يعني ..تحياتي لك وكل أصحابك من أول "الفراشة" لحد "الحفيد" :))

Omar Mostafa said...

هههههههههههههه تعيشي وتاخدي غيرها يا مبدعة يا جميلة، وربنا يكفينا شر حسحلاوي ورفاقة :-)

شيماء زاهر said...

آمين يارب العالمين...ولو إني عارفة إن طول ما فيه كتابة..فيه حسحلاوي :)

صباحك فل :))

Luna said...

الصراحة الموضوع برمته والتلعليقات بتفكرني بنكتة الاثنين اللي ساكنين في الدور ال 122 في ناطحة سحاب ، والأسانسير علطلان، وبقية النكتة معروفة، على العموم مجرد احساسك بالزهو من كلمات الاعجاب لقصة "بتاعة حد غيرك" اللي هو حسحلاوي ، اللي هو في الواقع انت، بس ما حدش عارف أنه هو انتي، بتفكرني براوية دائرة الطباشير القوقازية لبرشت. وأه الدنيا من ده على ده. على العموم احنا لو في بلد محترمة لكنت خربت بيت حسحلاوي ده، لكن أصله ما عداش على مصر، يا حبيتي يا مصر، يا مصصصصصصصصصصصصصصصصر

Mahmoud said...

صباح الكوميديا السوداء.. كان فيه عنوان مقال قديم لأستاذنا وعمنا اللباد بيقو "الفرخة لها بيت والشاذلي القليبي له بيت.. والكاتب والرسام ليس لهما بيت"
ده كان بمناسبة قيام الجامعة العربية أيام الشاذلي القليبي بسرقة حقوق فكرية لكتاب -مش فاكره- دلوقت- وإعادة نشره مع بعض التعديلات الانبطاحية..
يعني تحمدي ربنا ان جت على قد حسحلاوي وما وصلتش لعمرو موسى مثلاً !!!
:)

شيماء زاهر said...

لونا: والله أنت منور ..مش لونا بقى (وهي تعني القمر)!

أنا مش عارفة النكتة إللي إنت بتقول عليها، بس عادي..لما أشوفك تبقى تحكيهالي..أوك..؟

:)

أما بقى موضوع إني أخرب بيته والبلد المحترمة، فواضح إن مصر وحشاك أوي...!
حسى بيك والله من غير ما تقول ولا كلمة! امتلئ فخرا وفخارا وكبرياء..أديني أكثر..أكثر!

صباحك ياسمين وفل :)

-------------------------

محمود: أنا بس عايزة أقولك الأول إن رسوماتك حلوة أوي!

وعلى رأيك...حسحلاوي مش وحش برضة! ع الأقل الراجل ما عملش للقصة أي تعديلات انبطاحية! ذووق ..ذووق الحقيقة! آدي الناس الكُمّل ولا بلاش!

يلا، صباح الانبطاح و الوثب من الأماكن المرتفعة! وأهو كله رياضة P:

نورت المدونة بجد..

يتم تحديث المدونة أسبوعيا...تابعونا :)