كنت حاعيط بجد و أنا باتفرج على زاهي حواس في التليفزيون وعلى وجهه إبتسامة بلاستيكية وهو بيقول: "بُصوا للتمثال ...تحس أنه بيبتسم وهو شايف أحفاده حواليه
أنا بجد مش عارفة العالم دي بيقدر تتكلم كده إزاي (بعيدا عن إنجازات زاهي حواس
العلمية)... وببساطة شديدة ، منظر التمثال بالنسبة لي كان مثير للشفقة، وأنا بالمصادفة ماشية مع أخويا بالعربية فوق كوبري 6 أكتوبر..البتاعة الحديد إللي مركبنهالو على رأسه كانت بجد بتحسسني أن التمثال ده غلبان..ده زي ما يكون عنده حراره وحاطينولوا كمادات
!
الحاجة إللي بتبعث ع الإعياء بجد هو منظر الناس إللي جابوهم في التلفزيون..إللي عمال يهتف يقول "مصر" (وكأننا مثلا عرفنا نحسن إنتاج القطن) و إللي بيقول ده "حدث عظيم" وألا المذيع (الأهبل) بتاع الراديو وهو بيقول بكل سماجة "رمسيس يمشي في موكبه وهو فخووور بأحفادة".
أنا مش فاهمه ولا قادرة اتصور أي فخر إللي بيتكلم عليه الأستاذ..ده رمسيس ده لو كان عايش ، أقل حاجة كان عملها أنه ...( ولا ملاوش لازمة) ، وبعدين إيه حالة الأفورة إللي الناس فيها دي..ليه دايما انفعالتنا مبالغ فيها...فضا مثلا؟ تخلف؟ تطبيل و نفاق؟ تغييب للوعي؟ مش لاقيه صفة واحدة الحقيقة...
الوضع بالنسبة لي مؤرف لدرجة أني بجد مش لاقيه كلام تاني أقوله
أنا بجد خايفة لتجيي لي العدوة دي قريب وخاليني بقه أقولكم ع الكلام إللي بجد..
يا جماعة نقل التمثال ده حدث أسطوري مهيب لا ينفصل عن دور مصر الريادي في المنطقة ..بجد بجد أحلى سلام لتمثال رمسيس وإللي نقلوا تمثال رمسيس والمجلس الأعلى للثقافة والمقاولين العرب و أنا وأنت و ما تنسوش الأحفاد..اما الميدان بقه طبعا بعد نقل التمثال حكاية تانية.....أقول إيه و لا إيه..؟ كله قشطة و فل عليه
4 comments:
جامدة جدا جدا جدا ...هبقي أكمل تعليق لما أصحي من النوم بقي بكره عشان عايز أعلق أقول كتير
ضياء
انا متفق معاكي في البكاء والأفورة والخنقة...مش عارف لحد إمتى هنفضل نقول إن إحنا أحفاد الفراعين العظام....ونتمسح فيهم....يمكن عشان مفيش أي إنجاز بنعمله في حياتنا....الناس مش لاقية حاجة تعملها...فاضية على رأيك....
بجد الناس دي بتبيعلنا الوهم ..و المشكلة إن الناس ما بتصدق و تشتري و يا ريت قطاعي ده جملة كمان ...تعرفي يا ريتهم عرفوا يعملوا منه حاجة بالمقاييس السياحية زي مثلا ...نص مليون واحد أجنبي ( مش مصريين فاضيين مش هينفعوا الأقتصاد بتاعنا بشئ و آخرهم يهللوا علي حاجة ملهاش لازمة ) يقفوا يتفرجوا في صفوف و نظام زي ما بيحصل بره و بيستغلوا أي حاجة زي كده في زيادة الدخل السياحي بتاعهم ...و كانوا غطوا راس الراجل بحاجة شكلها أشيك من كده ولو رسموها حتي بدل منظره الغريب ده .
و عايز أكمل بدالك الجملة ...لو كان عايش كان راح فجر نفسه في مجلس الوزراء ولا البرلمان ولا قصر عابدين و كان ريحنا ولو مؤقتا ...
عموما يا ستي ..الشعب بتاعنا غاوي تفاهة فمش تقولي حاجة خالص ..اتفرجي و انتي ساكتة و أدعي ربنا يهديهم و ينور قلوبهم ...الموضوع مش مقرف ..الموضوع موضوع سطحية و تفاهة :(
حلو البوست و حلو أنك تخرجي خنقتك بدل ما تكتبتيها و يحصلك حاجة .
ضياء
الاخت شيماء قالوا فى المثل ان لم تستحى فافعل ماشاءت وانا اقول لهم ان لم تستحى فقل ماشاءت
فعلا تم حل جميع مشاكل مصر سواء السابقه او الاتيه فلا بطاله ولا اميه ولااطفال شوارع ولاانهيار فى التعليم ولا ولا ولا. فلما لانهتف لنقل تمثال رمسيس مع العلم انهم لو تركوا لمده عام واحد فقط لقام هو من نفسه بترك الميدان كله وربما ترك مصر كلها لما يراه حوله من اوضاع لاتسر احدا او ربما لايريد ان يحكمه وريت يحمل اسم رئيس
الى الامام دائما اخت شيماء
Post a Comment